54 nemendur útskrifuðust með grunnskólapróf frá skólanum þetta vorið. Stór hópur nemenda fékk viðurkenningar fyrir góðan námsárangur, ástundun og hegðun. Skólinn á góðan hóp velunnara sem styrkja starfið með því að veita viðurkenningar á skólaslitum og eru þeim öllum færðar kærar þakkir fyrir stuðninginn. Að venju spiluðu nemendur Njarðvíkurskóla og Tónlistarskóla Reykjanesbæjar á hljóðfæri við skólaslitin. 

Á skólaslitum var rifjað upp að skólinn fékk Grænfánann í annað sinn og næstu skref í umhverfismálum verður að skerpa á umhverfismennt í námskrám allra bekkja.  Einnig var sagt frá því að kraftur var í félagslífi nemenda og lið nemenda stóðu sig vel í þeim keppnum sem þeir tóku þátt í. Nemendaráð og 10. bekkur tóku þátt í að undirbúa öskudagsskemmtun og íþróttadaginn og komu með breytingar á fyrirkomulagi daganna sem má segja að hafi hitt í mark hjá nemendum.