Njarðvíkurskóli

Skólaslit Njarðvíkurskóla vor 2026

Thu, 11 Jun 2026 11:55:00 +0000

Skólaslit Njarðvíkurskóla fóru fram við hátíðlega athöfn á sal skólans miðvikudaginn 10. júní hjá nemendum í 1.-10. bekk. Skólaslit hjá 1.-10. bekk var skipt upp í fjóra hluta: 1.-3. bekkur, 4.-6. bekkur, 7.-9. bekkur og að lokum 10. bekkur. Skólaslitin byrjuðu á sal þar sem Helena Rafnsdóttir deidarstjóri yngsta stigs ávarpaði nemendur í 1.-3. bekk, Kristín Blöndal deildarstjóri í Ösp ávarpaði nemendur í 4.-6. bekk og Jóhann Gunnar Sigmarsson deildarstjóri elsta stigs ávarpaði nemendur í 7.-9. bekk. Að því loknu fóru nemendur ásamt forráðamönnum í sínar heimastofur þar sem umsjónarkennari fór yfir hápunkta skólaársins og afhendi nemendum sinn vitnisburð. Á öllum skólaslitum voru flutt tónlistaratriði þar sem nemendur spiluðu og stóðu sig einstaklega vel og þökkum við í skólanum þeim fyrir þeirra flutning. Á skólaslitum hjá 1.-3. bekk voru það Oddur Líndal Sverrisson á píanó og Oliver Aron Kalnins á klarínett, hjá 4.-6. bekkjar spilaði Brynhildur Hrönn Þorradóttir á saxafón og hjá 7.-9. bekkjar spilaði Elin Mia Y. Hardonk á selló og spilaði Geirþrúður Bogadóttir tónlistarkennari á píanó undir hjá henni. Hér að neðan má sjá myndir frá útskrift allra árganga en fleiri myndir munu birtast síðar.

Formannsskipti hjá nemendafélagi Njarðvíkurskóla

Mon, 08 Jun 2026 12:48:00 +0000

Í lok skólaárs fóru fram formannsskipti hjá nemendafélagi Njarðvíkurskóla. Nemendur í 7.–9. bekk ásamt starfsfólki skólans kusu á milli þeirra nemenda sem buðu sig fram til formanns. Sá aðili sem hlaut flest atkvæði var kjörinn formaður en sá sem hlaut næstflest atkvæði var kjörinn varaformaður. Þau sem voru kosin voru Rósa Kristín Jónsdóttir formaður og Grétar Atli Sigurbjörnsson varaformaður. Á sumarhátíð Njarðvíkurskóla afhentu fráfarandi formaður Karen Ósk Lúthersdóttir og fráfarandi varaformaður Vilberg Eldon Logason nýjum formanni og varaformanni nemendafélagsins lykilinn að skólanum fyrir skólaárið 2026–2027. Við þökkum Karen Ósk og Vilbergi Eldon fyrir gott starf í vetur og óskum Rósu Kristínu og Grétari Atla velfarnaðar í störfum sínum á komandi skólaári.

Sumarhátíð Njarðvíkurskóla

Sat, 06 Jun 2026 16:31:00 +0000

Fimmtudaginn 4. júní var haldin glæsileg sumarhátíð í Njarðvíkurskóla í blíðskaparveðri. Nemendur, starfsfólk, forráðamenn og aðrir gestir komu saman og nutu skemmtilegrar dagskrár sem einkenndist af gleði, samveru og góðri stemningu. Hátíðin hófst með skrúðgöngu um nágrenni skólans þar sem nemendur gengu fylktu liði og settu skemmtilegan svip á hverfið. Að henni lokinni tóku við fjölbreyttar afþreyingarstöðvar á skólalóðinni þar sem allir gátu fundið eitthvað við sitt hæfi. Mikil ánægja vakti þegar veltibíllinn mætti á svæðið og fengu nemendur þar einstakt tækifæri til að upplifa mikilvægi öryggisbúnaðar í bílum á lifandi og fræðandi hátt. Þá voru einnig fjölmargar aðrar stöðvar í boði sem nutu mikilla vinsælda meðal nemenda, má þar nefna Glimmerbarinn þar sem nemendur gátu fengið andlitsmálningu. Einn af hápunktum dagsins var hið vinsæla litahlaup þar sem Brunavarnir Suðurnesja tóku þátt. Þar sem þeir sprautuðu vatni yfir nemendur áður en þeir hlupu af stað í litahlaupið sem vakti mikla lukku. Í lok hátíðarinnar bauð Foreldrafélag Njarðvíkurskóla öllum gestum upp á pylsur og var það kærkominn endir á einstaklega vel heppnuðum degi. Með fréttinni fylgir myndasafn sem gefur góða mynd af þeirri gleði sem einkenndi daginn. Njarðvíkurskóli þakkar öllum þeim sem komu að undirbúningi og framkvæmd hátíðarinnar og gerðu hana að eftirminnilegum degi fyrir nemendur og gesti.

Marta Caber tilnefnd til Hvatningarverðlauna mennataráðs Reykjanesbæjar

Fri, 05 Jun 2026 09:41:00 +0000

6. júní síðastliðin voru Hvatningarverðlaun menntaráðs Reykjanesbæjar afhent í Bergi við hátíðlega athöfn. Marta Caber starfsmaður í Ösp, sérhæfðu námsúræði í Njarðvíkurskóla, var tilnefnd í ár fyrir öflugt og metnaðarfullt frístundastarf í Ösp. Hver leik- og grunnskóli í Reykjanesbæ átti að tilnefna verkefni sem þótti skara fram úr í þeirra starfi og voru 15 verkefni tilnefnd. Það voru síðan 3 verkefni sem voru sérstaklega viðurkennd og var tilnefning Mörtu eitt af þeim þremur, sem er einstaklega góður árangur. Marta Caber hefur frá árinu 2023 leitt frístundaheimilið Ösp af mikilli fagmennsku og metnaði. Undir hennar stjórn hefur starfsemin orðið enn markvissari og fjölbreyttari með skýra áherslu á þátttöku og vellíðan nemenda í Ösp sem eru með ríkar stuðningsþarfir. Hún hefur innleitt skapandi og sjónrænt skipulag, eflt samstarf við meðal annars skátafélagið Heiðabúa, bókasafn og heimilisfræði og þróað verkefnið Asparkot fyrir eldri nemendur. Marta hefur jafnframt nýtt nám sitt í tómstunda- og félagsmálafræði markvisst til að efla starfið. Foreldrar og starfsfólk hafa lýst mikilli ánægju með hennar framlag og hefur hún haft afar jákvæð áhrif á bæði frístunda- og skólastarf. Mörtu er óskað innilega til hamingju með þessa tilnefningu og það frábæra starf sem hún hefur unnið ásamt öðru starfsfólki í frístundaheimilinu í Ösp.

Sumarhátíð Njarðvíkurskóla

Wed, 03 Jun 2026 10:42:00 +0000

Sumarhátíð Njarðvíkurskóla verður haldin fimmtudaginn 4. maí frá kl. 10:00-12:00. Nemendur mæta í skólann kl. 9:50 og hefst skrúðganga stundvíslega kl.10:00. Kynning á nýjum formanni nemendaráðs fyrir skólaárið 2026-2027 mun fara fram á Sumarhátíðinni ásamt fjölbreyttri afþreying á skólalóð og í skrúðgarði t.d. veltibíll, vítakeppni, kassabílar, hoppbelgir, krítarstöð, pokakast, Just dance Njarðvíkurskóli, Glimmerbar, Litahlaup og margt fleira. Mikilvægt er að þátttakendur í Litahlaupinu þurfa að vera í fötum sem mega blotna og fá litaduft yfir sig. Forráðamenn og aðrir gestir eru velkomnir og þar sem bílastæði starfsfólks verða nýtt fyrir viðburði er mælst til þess að gestir geri ráð fyrir lengri gönguleið að skólanum. Að sumarhátíð lokinni kl: 12:00 er frístund fyrir þá nemendur sem eru skráðir. Frístundaheimili bæði í skóla og Ösp eru opin frá 8:15-16:15 fyrir þá nemendur sem eru þar skráðir.

Nemendur úr Njarðvíkurskóla fengu Mannréttindabikar ÖBÍ

Tue, 02 Jun 2026 08:03:00 +0000

Nemendurnir Hjördís Lilja Egilsdóttir og Stefania Szymanowska í 5. bekk Njarðvíkurskóla náðu frábærum árangri þegar þær komust alla leið í úrslit Nýsköpunarkeppni grunnskólanna 2026 með hugmynd sína, „Bókin ykkar“. Hugmyndin byggir á því að skapa aðgengilega og skemmtilega bók fyrir blinda þar sem saman fara áþreifanlegt efni, hljóðupplifun og blindraletur. Markmiðið er að gera lestur og upplifun bóka ríkari og aðgengilegri fyrir alla. Lokahóf keppninnar fór fram laugardaginn 30. maí á Menntavísindasviði Háskóla Íslands. Þar komu saman efnilegustu nýsköpunarnemendur landsins til að kynna hugmyndir sínar og fagna árangri sínum eftir viðburðaríkt keppnisár. Mikil samkeppni var í keppninni en alls bárust yfir 500 hugmyndir frá nemendum í 5.–7. bekk víðs vegar af landinu. Aðeins 25 hugmyndir voru valdar til úrslita og því er árangur þeirra Hjördísar Lilju og Stefaníu sérstaklega glæsilegur. Í aðdraganda lokahófsins tóku úrslitanemendur þátt í skapandi vinnustofum þar sem þau fengu tækifæri til að þróa hugmyndir sínar áfram, vinna með sérfræðingum og undirbúa kynningar á verkefnum sínum. Að lokum fengu þær Mannréttindabikar Nýsköpunarkeppni grunnskólanna og Öryrkjabandalags Íslands og var það Frú Halla Tómasdóttir forseti Íslands sem veitti þeim verðlaunin.

Opnað fyrir umsóknir í vetrarfrístund

Fri, 29 May 2026 10:35:00 +0000

Opnað hefur verið fyrir umsóknir í frístundaheimili grunnskólanna fyrir skólaárið 2026 – 2027. Umsóknir eru fyrir börn í 1. – 4. bekk.

Nýsköpunarkeppni grunnskóla

Fri, 29 May 2026 08:05:00 +0000

Nýsköpunarkeppni grunnskóla fyrir 5.-7. bekk fer fram ár hvert. Þar fá nemendur tækifæri til að senda inn eigin hugmyndir. Í ár komust alls 25 hugmyndir áfram af 502 innsendum og voru þar á meðal tveir nemendur Njarðvíkurskóla sem komust áfram með hugmyndina sína „Bókin ykkar“ sem er bók ætluð blindum þar sem blindaletur kemur upp um leið og hægt er að hlusta. Þær Hjördís Lilja Egilsdóttir og Stefania Szymanowska úr 5. GS komust áfram í úrslit sem fara fram núna 28.–30. maí í Háskóla Íslands. Þar er unnið áfram með börnunum í því að þróa hugmyndir sínar enn frekar Við erum afar stolt af okkar nemendum í Njarðvíkurskóla og óskum þeim innilega til hamingju og góðs gengis í úrslitunum.

Skólaslit Njarðvíkurskóla vor 2026

Thu, 28 May 2026 08:00:00 +0000

Skólaslit hjá nemendum í Njarðvíkurskóla verða við hátíðlega athöfn á sal skólans miðvikudaginn 10. júní. Skólaslit fara fram hjá nemendum í : 1.- 3. bekkur kl. 8:30 4.- 6. bekkur kl. 9:30 7.- 9.bekkur kl. 10:30 10. bekkur kl. 12:30 Nemendur eru hvattir til að mæta prúðbúnir á skólaslitin og forráðamenn með sínum börnum. Eftir skólaslit eru nemendur komnir í sumarfrí.

Próf í 7.-10. bekk

Tue, 05 May 2026 11:18:00 +0000

Líkt og undanfarin ár setjum við upp próftöflu fyrir yfirlitspróf í íslensku, stærðfræði og ensku fyrir 7.-10. bekk. Á meðfylgjandi mynd má sjá próftöflu ásamt því hvaða daga sjúkrapróf eru fyrir þessi próf.

Tónleikar nemenda í 3. bekk

Mon, 04 May 2026 09:29:00 +0000

Þann 4. maí komu nemendur í 2. og 3. bekk saman á sal Njarðvíkurskóla þar sem nemendur í 3. bekk í Njarðvíkurskóla sem stunda nám við Tónlistarskóla Reykjanesbæjar héldu tónleika fyrir samnemendur sína. Nemendur komu fram og spiluðu undir stjórn kennara sinna úr tónlistarskólanum, þeim Geirþrúði Fanney Bogadóttur og Halldóri Gylfasyni. Tókust tónleikarnir einstaklega vel og var gaman að sjá þessa hæfileikaríku nemendur spila. Þeir nemendur sem tóku þátt voru: Axel Þór Aronsson á fiðlu Árni Dagur Sigurpálsson á gítar Hafsteinn Logi Atlason á gítar Harpa Margrét Harðardóttir á píanó Heimir Arnar Ástuson á trompet Klara Hermannsdóttir Egyed á piano Nataniel Jakub Janik á gítar Oliver Aron Kalnins á klarínett Skarphéðinn Jónsson á sílófón Sóllilja Alaia Roa Valsdóttir á píanó

Litla upplestarhátíðin í Njarðvíkurskóla

Thu, 30 Apr 2026 16:41:00 +0000

Litla upplestrarhátíðin fór fram í Njarðvíkurskóla þann 30. apríl síðastliðinn. Þar stigu nemendur í 4. bekk á svið og sýndu afrakstur æfinga vetrarins í upplestri. Þau hafa unnið markvisst að undirbúningi undir leiðsögn umsjónarkennara sinna, Örnu Lindar Kristinsdóttur og Júlíu Scheving Steindórsdóttur. Foreldrar og aðstandendur mættu og nutu þess að hlýða á vandaðan og skemmtilegan upplestur nemenda. Í upphafi hátíðar lásu Berglind Elva Rafnsdóttir og Hrafnhildur Embla Ægisdóttir, sem stóðu uppi sem sigurvegarar í Stóru upplestrarkeppninni í 7. bekk fyrr í vetur. Þær settu skemmtilegan og hvetjandi tón fyrir dagskrána. Hátíðin tókst afar vel og ljóst að nemendur höfðu lagt mikla vinnu og metnað í verkefnið.

Stóri plokkdagurinn 2026

Wed, 29 Apr 2026 15:55:00 +0000

Stóri plokkdagurinn fór fram í Njarðvíkurskóla föstudaginn 24. apríl síðastliðinn. Margir bekkir tóku þátt og var dugnaður nemenda til mikillar fyrirmyndar. Nemendur gengu um nærumhverfi skólans tíndu rusl og lögðu sitt af mörkum til að fegra og bæta umhverfið. Talsvert magn af rusli safnaðist saman og var það flokkað og sett í plokkker Reykjanesbæjar. Dagurinn var bæði lærdómsríkur og skemmtilegur og fengu nemendur tækifæri til að upplifa mikilvægi þess að ganga vel um náttúruna og bera ábyrgð á umhverfi sínu.

Skíðaferð í Bláfjöll

Tue, 21 Apr 2026 09:37:00 +0000

Nemendur í skíðavali Njarðvíkurskóla úr 8.–10. bekk fóru fimmtudaginn 16. apríl í skíðaferð í Bláfjöll sem heppnaðist afar vel í alla staði. Veðrið var fínt og aðstæður ágætur sem gerði ferðina bæði ánægjulega og lærdómsríka. Margir nemendur voru að stíga sín fyrstu skref á skíðum en sýndu ótrúlega þrautseigju og dugnað við að takast á við nýjar áskoranir. Það var greinilegt að framfarirnar voru miklar yfir daginn og gaman að sjá sjálfstraustið aukast jafnt og þétt. Í ferðinni voru íþróttakennararnir Heiðrún Rós, Ásgerður Bjarklind og Þórir Rafn sem leiðbeindu nemendum og sáu til þess að allt færi vel fram. Ferðin tókst einstaklega vel og skilur eftir góðar minningar hjá bæði nemendum og kennurum.

Skóladagatal fyrir skólaárið 2026-2027

Sat, 11 Apr 2026 12:44:00 +0000

Skóladagatal fyrir Njarðvíkurskóla og Ösp skólaárið 2026-2027 hefur verið birt og hægt er að nálgast á heimasíðu skólans. Dagatalið hefur verið samþykkt af starfsfólki skólans, skólaráði og hjá menntaráði Reykjanesbæjar.

Páskafrí 2026

Fri, 27 Mar 2026 14:10:00 +0000

Páskafrí í skólanum hefst mánudaginn 30. mars. Kennsla hefst aftur samkvæmt stundaskrá þriðjudaginn 7. apríl. Við óskum öllum nemendum og forráðamönnum gleðilegra páska og vonum að þið njótið vel yfir hátíðarnar. Við hlökkum til að taka á móti öllum endurnærðum og tilbúnum í lokasprett skólaársins.

Friðarveggspjaldarsamkeppni Lions

Thu, 26 Mar 2026 12:45:00 +0000

Helga Margrét Steinarsdóttir nemandi í 7. KE hlaut í marsmánuði verðlaun frá Lionsklúbbnum Freyju fyrir þátttöku sína í Friðarveggspjaldakeppni Alþjóðahreyfingar Lions á Íslandi skólaárið 2025–2026. Í keppninni unnu nemendur veggspjöld út frá þemanu „Allir sem einn“. Verk Helgu vakti sérstaka athygli en í því sýnir hún á áhrifaríkan hátt hvernig íþróttir og félagsstörf geta sameinað fólk um allan heim – allir sem einn. Verðlaunin voru afhent í kennslustofu Helgu þar sem fulltrúar Lionsklúbbsins Freyju mættu ásamt Helenu Mariu myndlistakennara. Við óskum Helgu Margréti innilega til hamingju með þennan glæsilega árangur.

UPPFÆRÐ FRÉTT - Vegna veðurviðvörunar á morgun, fimmtudaginn 26. mars

Wed, 25 Mar 2026 14:08:00 +0000

UPPFÆRT 26. mars kl. 7:30 Neyðarstjórn sveitarfélagsins hefur farið yfir stöðuna. Skólahald fer fram í dag að óbreyttu. Þótt skólar séu opnir þurfa forsjáraðilar að meta hvort aðstæður séu öruggar fyrir börn að komast í og úr skóla og láta vita ef forföll verða eða ef börn komast ekki í skólann. Skráð verður leyfi eða forföll hjá þeim börnum. Mikilvægt er að fylgja börnum inn og út úr skólabyggingum til að tryggja öryggi, sérstaklega með hliðsjón af veðri, færð og aðstæðum í nærumhverfi. Allir vegir eru opnir og snjóþjónusta sveitarfélagsins er í fullum gangi til að halda vegum færum. Heima-og stuðningsþjónusta mun skerðast og verður þjónustu forgangsraðað til þjónustunotenda í dag. Dagþjónusta mun skerðast í dagdvölum eldri borgara, hæfingarstöðinni og Björginni en þjónusta í sólarhringsúrræðum hefur verið tryggð. Veðurstofa Íslands hefur gefið út appelsínugula veðurviðvörun sem gildir frá kl. 07:00 til 13:00 á morgun, 26. mars. Neyðarstjórn sveitarfélagsins hefur farið yfir stöðuna og fer skólastarf fram að svo stöddu nema annað verði sérstaklega tilkynnt. Forsjáraðilar eru eindregið hvattir til að meta hvort aðstæður séu öruggar fyrir börn að komast í og úr skóla. Mikilvægt er að fylgja börnum inn og út úr skólabyggingum til að tryggja öryggi, sérstaklega með hliðsjón af veðri, færð og aðstæðum í nærumhverfi. -------------- Förum varlega og fylgjumst vel með veðurspám og upplýsingum frá Veðurstofu Íslands, viðbragðsaðilum, sveitarfélaginu og öðrum þjónustuaðilum, þar á meðal varðandi akstur innanbæjarstrætó og aðra samgönguþjónustu. Við hvetjum öll til að huga að niðurföllum og lausamunum. Neyðarstjórn mun funda kl. 7:00 í fyrramálið og verða upplýsingar uppfærðar ef forsendur breytast.

Árshátíð Njarðvíkurskóla 2026

Tue, 24 Mar 2026 10:45:00 +0000

Árshátíð skólans fór fram við mikla gleði og glæsibrag föstudaginn 20. mars og var þemað í ár „Tímavélin“. Nemendur ferðuðust þar í gegnum tímann, þar sem hver árgangur valdi sér sinn áratug og setti upp skemmtilegt atriði í anda hans. Útkoman var fjölbreytt og litrík dagskrá sem frábæra einstaka stemningu. Íþróttahúsinu hafði verið breytt í glæsilegt leikhús þar sem ljós, hljóð og sviðsmynd sköpuðu skemmtilega stemmningu. Nemendur í 9. og 10. bekk gegndu lykilhlutverkum í undirbúningi og framkvæmd hátíðarinnar og sáu meðal annars um sviðsstjórn, ljós, hljóð og aðstoð á bak við tjöldin. Framlag þeirra skipti sköpum og stóðu þau sig með mikilli prýði. Það var augljóst að mikil vinna og metnaður lá að baki öllum atriðum og nemendur sýndu bæði sköpunargleði og samvinnu. Stemningin í salnum var frábær og var gaman að sjá hvað allir virtust skemmta sér vel. Að lokinni sýningu var boðið upp á kökur og drykki í skólanum þar sem gestir og nemendur gátu átt notalega stund saman að lokinni árshátíð. Það er óhætt að segja að árshátíðin hafi tekist einstaklega vel og eru margir farnir að hlakka til árshátíðar næsta árs.

Matsferill, stöðu- og framvindupróf í Njarðvíkurskóla

Mon, 23 Mar 2026 08:45:00 +0000

Nemendur í Njarðvíkurskóla í 4.-10. bekk hafa síðustu 3 vikur þreytt stöðu- og framvindupróf Matsferils í lesskilningi og stærðfræði. Prófin eru tekin á Chromebook tölvur og eru niðurstöður væntanlegar um miðjan maí. Nemendur hafa yfir höfuð staðið sig frábærlega, sýnt þrautseigju og dugnað auk þess að vera jákvæð fyrir prófatökunni. Lögboðið er að leggja prófin fyrir nemendur í 4., 6. og 9. bekk en ákveðið var í grunnskólum Reykjanesbæjar að allir nemendur í 4.-10. bekk sem fylgja námskrá árgangs taki prófin svo hægt sé að nota niðurstöður prófanna til skipulagningar kennslu í samræmi við stöðu nemenda og við mat á árangri kennslunnar. Tilgangur stöðu- og framvinduprófa Matsferils í lesskilningi og stærðfræði er að draga upp sem nákvæmasta mynd af stöðu nemanda og framvindu í námi, hvar áskoranir og styrkleikar liggja svo hægt sé að mæta námslegum þörfum nemenda á árangursríkan hátt.