Fréttir

Föstudaginn 21. apríl og mánudaginn 24. apríl eru starfsdagar í Njarðvíkurskóla. Allir nemendur eiga frí þessa daga. Frístundaheimili yngri nemenda og frístund í Ösp eru lokuð þessa daga. Friday the 21th of Apríl and Monday the 24th of April is a teachers work day in Njarðvíkurskóli. All students have a vacation these days. The after school program is closed these days. Piatek 21 kwietnia i poniedzialek 24 kwietnia to dzien pracy nauczycieli w Njarðvíkurskóli. Wszyscy studenci maja dzis wakacje. Program zajec pozalekcyjnych jest obecnie zamkniety.

Árlegur hátíðarkvöldverður nemenda í 10. bekk með kennurum og starfsfólki var haldinn 13. apríl. Hátíðarkvöldverðurinn er orðinn fastur liður hjá útskriftarárgangi en hann var fyrst haldinn árið 1984. Forráðamenn höfðu veg og vanda af þessari frábæru kvöldstund sem er ávallt eftirminnileg. Salurinn var glæsilega skreyttur og boðið var upp á tveggja rétta máltíð frá Soho, lambalæri með bérnaise, tex mex kjúkling með ostasósu og nachos og meðlæti. Í eftirrétt var ísterta. Kristján Jóhannsson var veislustjóri og stýrðu dagskrá atriða frá nemendum og kennurum. Eftir matinn og dagskrá fóru nemendur á sameiginlega árshátíð grunnskólanna í Stapa.

Páskafrí hefst mánudaginn 3. apríl. Kennsla hefst aftur þriðjudaginn 11. apríl samkvæmt stundaskrá. Við vonum að allir hafi það gott í fríinu og mæti að því loknu fullir orku til að takast á við síðasta hluta skólaársins. Gleðilega páska.

Árshátíð Njarðvíkurskóla var haldin 24. mars fyrir troðfullu húsi. Mikið var um flott atriði sem Íris Björk Davíðsdóttir og Heimir Gamalíel Helgason, kynntu til leiks. Nemendur sýndu dansa, leikþætti og söng. Hátíðin var opnuð með frábæru opnunaratriði, undir stjórn Heiðrúnar Rós Þórðardóttur, sem nemendur úr nokkrum árgöngum tóku þátt í og gaf það atriði tóninn fyrir þá skemmtun sem í boði var. Alls voru átta atriði sýnd sem öll vöktu mikla lukku hjá troðfullu íþróttahúsinu af nemendum, starfsmönnum, forráðamönnum og öðrum gestum. Eftir árshátíðina fóru allir yfir í skóla þar sem boðið var uppá skúffuköku og gos. Frábær dagur í alla staði og eiga nemendur og starfsmenn þakkir fyrir skemmtileg atriði og árshátíðarnefndin og nemendur sem unnu viðhátíðina fyrir frábæran undirbúning og skipulag. Einnig þakkar Njarðvíkurskóli starfsmönnum í íþróttahúsi fyrir frábæra aðstoð. Nemendur sem unnu að hátíðinni voru: Ástríður Auðbjörg Halldórsdóttir, Embla Sól Sverrisdóttir, Frosti Kjartan Rúnarsson, Heiðdís Birta Davíðsdóttir, Heiðrún Edda Davíðsdóttir, Heimir Gamalíel Helgason, Helena Líf Elvarsdóttir, Hildigunnur Eir Kristjánsdóttir, Íris Björk Davíðsdóttir, Kári Steinn Matthíasson, Keeghan Freyr Kristinsson og Sölvi Steinn Sigfússon.

Árshátíð Njarðvíkurskóla verður haldin föstudaginn 24. mars 2023. Hefðbundin kennsla fellur niður þennan dag og frístundaheimilin eru lokuð. Nemendur mæta í sínar heimastofur kl. 11:30. Forráðamenn mæta út í íþróttahús og koma sér í stúku. Fjölmargir nemendur hafa þó hlutverkum að gegna fyrr um morguninn s.s. að vinna að uppsetningu eða æfa sýningaratriði. Þeir mæta því um morguninn samkvæmt fyrirmælum umsjónarkennara. Skemmtidagskrá hefst kl. 12:00 í íþróttahúsi við Njarðvíkurskóla og verða þar frátekin sæti fyrir hvern árgang en gestir þeirra fá sæti í stúku. Það er því mikilvægt að bekkurinn geti farið saman úr skólanum yfir í íþróttahúsið. Forráðamenn, eru hvattir til að mæta og taka þátt í hátíðarhöldunum með okkur. Eftir dagskrá í íþróttahúsi eru börn í umsjá forráðamanna sinna. Afar og ömmur og aðrir fjölskyldumeðlimir eru að sjálfsögðu líka velkomin. Skapast hefur hefð að hafa kaffiveitingar í skólanum fyrir árshátíðargesti að skemmtiatriðum loknum. Í ár verður boðið upp á skúffuköku og öl/kaffi. Við vonumst til að eiga skemmtilegan dag og minnum nemendur á að mæta stundvíslega og snyrtilega klædd.

Fimmtudaginn 16. mars voru forskólanemendur í 2. bekk með tónleika á sal fyrir nemendur í 1. bekk og spiluðu og sungu lögin Blokklingarnirog Litli indíáninn. Nemendurnir komu svo fram á Stórtónleikum Forskóla Tónlistarskólans, sem haldnir voru fyrir fullu húsi í Stapa sama dag. Lúðrasveit Tónlistarskóla Reykjanesbæjar og Rokksveit, skipuð tónlistarnemendum í T.R. sáu um undirleikinn. Báðir tónleikarnir heppnuðust mjög vel.

Vinakot var í fyrsta skipti með myndlistasýningu skólaárið 2021-2022 og voru tveir nemendur í hverjum árgangi í 1.-10. bekk sem tóku þátt. Efniviðurinn sem var notaður voru afgans spýtur úr smíðastofunni hjá Hörpu. Verkefnið fékk mjög góðar undirtektir og ákváðum við þess vegna að hafa aðra sýningu núna á þessu skólaári og vinna hana með sömu áherslum og áður. Eina breytingin er að nemendur hafa núna meira val á efnivið að vinna með. Þegar nemendur skólans koma á sýninguna sem er í stigaganginum á milli hæða þá er þar skál með málsháttum sem nemendur geta dregið og tekið með sér í kennslustofuna og unnið meira með þá. Umsjónarmaður Vinakots og skólavina verkefnisins er Sjöfn Sóley Guðlaugsdóttir.

Lokahátíð Stóru upplestrarkeppninnar fór fram í Stapa í dag 9. mars. Þar komu saman keppendur úr 7. bekk frá öllum grunnskólum Reykjanesbæjar og kepptu fyrir hönd síns skóla. Keppnin er ávallt sett á Degi íslenskrar tungu, þann 16. nóvember og markmið hennar er að vekja athygli og áhuga í skólum á vönduðum upplestri og framburði. Fyrir hönd Njarðvíkurskóla tóku þátt Hafdís Inga Sveinsdóttir og Elís Einar Klemens Halldórsson, varamaður þeirra var Taiga Maria Baltrimai. Þau stóðu sig frábærlega og sýndu hversu mikið þau hafa lagt sig fram síðustu vikur og mánuði undir handleiðslu Jóhanns Gunnars Sigmarssonar og Auðar Ásgrímsdóttur íslenskukennara þeirra. Hafdís Inga Sveinsdóttir sigraði keppnina í Stapa í ár, sem er frábær árangur þar sem keppnin var einstaklega jöfn og spennandi. Allir lesarar stóðu sig með mikilli prýði og mjög erfitt var fyrir dómara að gera upp á milli þeirra. Það er því ljóst að nemendur í Reykjanesbæ hafa staðið sig afar vel í ræktunarhluta keppninnar í skólunum áður en til lokahátíðarinnar kom. Njarðvíkurskóli óskar Hafdísi Ingu innilega til hamingju með frábæran árangur sem og Elísi Einari fyrir frábæran flutning.

Öskudagurinn var haldinn hátíðlegur í Njarðvíkurskóla 22. febrúar 2023. Yngra stigið (1.-5. bekkur) fór í þrautir í íþróttahúsinu og eldra stigið (6.-10. bekkur) tók þátt í ýmsum þrautum í stofunum á 3. hæð skólans. Nemendur í 10. bekk settu upp draugahús sem allir nemendur gátu farið í gegnum.

Gylfi Guðmundsson fyrrverandi skólastjóri Njarðvíkurskóla er látinn. Við sem störfuðum með honum minnumst hans með hlýhug og virðingu. Hann treysti sínu starfsfólki í hvívetna og var starfsfólki skólans góður bakhjarl en jafnframt bar hann hag nemandans ávallt fyrir brjósti. Gylfi var skólastjóri við Njarðvíkurskóla frá árinu 1983 til ársins 2004 og kom sem ferskur blær inn í skólasamfélag Njarðvíkurskóla og var mikill skólamaður. Hann var vakandi yfir nýjungum og mörgu því sem betur mætti fara í skólastarfinu og hafði mikinn metnað fyrir starfi skólans. Ýmsar nýjungar sáu dagsins ljós á þessum árum en Gylfi var áhugasamur um tækni og vildi að skólinn væri í fremstu röð hvað það varðar. Einnig lagði hann áherslu á og barðist fyrir því að kennarar skólans væru þátttakendur í tveggja ára starfsleikninámi á vegum Kennaraháskólans. Í kjölfar þessa náms leit fyrsta skólanámskrá skólans dagsins ljós. Gylfi lagði grunn að mörgum verkefnum sem við byggjum enn á og stöndum fyrir í skólastarfinu og má þar nefna hátíðarkvöldverð 10. bekkjar sem fleiri skólar hér á svæðinu hafa tekið upp. Hann samdi textann við skólasöng Njarðvíkurskóla í tilefni af 60 ára afmæli skólans og fékk Rúnar Júlíusson til að semja lagið. Merki skólans sem og einkunnarorð skólans komu fram og voru unnin í hans stjórnendatíð. Gylfi hafði góðar tengingar við Danmörku og eru það nokkrar ferðirnar sem hann stóð fyrir þangað. Hann fór með starfsmannahópinn til Danmerkur í náms- og kynnisferðir en einnig var farið nokkrum sinnum með elstu nemendur skólans í útskriftarferð til Danmerkur og nýttust þá tengslin sem Gylfi hafði vel í þær ferðir. Njarðvíkurskóli stendur í þakkarskuld við Gylfa fyrir farsæla og gefandi samleið og vottar aðstandendum hans innilega samúð. Ásgerður Þorgeirsdóttir, skólastjóri Njarðvíkurskóla Útför Gylfa Guðmundssonar fer fram frá Keflavíkurkirkju fimmtudaginn 23. febrúar kl. 11:00.