Fréttir

Á aðventunni er hefð fyrir því að nemendur og starfsfólk Njarðvíkurskóla geri sér glaðan dag og föndri saman. Það er mikilvægt að brjóta upp hefðbundið skólastarf. 13. desember var jólaföndursdagur og voru nemendur duglegir að föndra og skapaðist góð stemning. Sama dag var hinn árlegi hátíðarmatur í skólanum. Starfsmenn skólans báru á borð fyrir alla nemendur og salurinn er skeyttur. Þetta er alltaf hátíðleg stund og tengist föndurdeginum sem var haldinn sama dag. Boðið var upp á kalkún með salvíusmjöri, vegan Wellington, gljáðar kartöflur, eplasalat, heita sveppasósa og ísblóm.

Jólahátíð Njarðvíkurskóla verður miðvikudaginn 20. desember. Þetta er skertur nemendadagur svo nemendur mæta á jólahátíðina og fara svo heim að henni lokinni. Frístundaheimilin eru lokuð þennan dag bæði yngri deild sem og frístundaheimilið í Ösp. Skipulag jólahátíðar er eftirfarandi: Nemendur 1.b, 3.b, 5.b,7.b, og 10. bekk mæta kl. 9:00-10:30 Nemendur í 2. b, 4.b, 6.b, 8.b, og 9.b mæta kl. 9:45-11:15 Upplýsingar koma frá hverjum umsjónarkennara varðandi hvað nemendur eiga koma með á jólahátíðina. Allir nemendur ganga inn um yngri barna inngang. Að lokinni jólahátíð hefst jólafrí hjá nemendum og starfsmönnum skólans. Skólastarf hefst samkvæmt stundatöflu eftir jólafrí miðvikudaginn 3. janúar 2024 Við óskum nemendum og fjölskyldum þeirra gleðilegrar jólahátíðar. Hátíðarkveðjur, Stjórnendur Njarðvíkurskóla.

Nemendur í 8.AÁ og 8.HH fóru á skauta í Aðventugarðinum í Reykjanesbæ 8. desember í björtu og fallegu en nokkuð köldu veðri. Allir skemmtu sér konunglega eins og má sjá á meðfylgjandi myndum. Margir sýndu frábær tilþrif á svellinu og dagurinn var svo kláraður með heitu kakói og piparkökum áður en haldið var inn í helgina. Mælum eindregið með þessari skemmtun fyrir allar fjölskyldur.

Hið árlega jólabingó Njarðvíkurskóla var haldið með pomp og prakt 7. desember. Frábær mæting var meðal nemenda og fjölskyldumeðlima. Allir virtust skemmta sér vel þó að sumir fóru súrir út eftir að hafa misst af vinningum. Nemendaráðið þakkar fyrirtækjum bæjarins fyrir stuðninginn og öllum fyrir komuna og óskar öllum um leið gleðilegrar hátíðar.

Frábær mæting var á árlegt jólaföndur foreldrafélags Njarðvíkurskóla sem haldið var á sal skólans miðvikudaginn 29. nóvember. Bæði nemendur og forráðamenn mættu meðal annars til að föndra myndir, skreyta piparkökur, útbúa jólakort og perla jólaskraut.

Dagana 6. – 10. nóvember fóru 11 nemendur ásamt tveimur kennurum til Noregs, í bæinn Tonsberg. Þetta var þriðja ferðin í verkefni á vegum Nordplus Junior. Í fyrstu tveimur ferðunum, sem voru í Litháen og Svíþjóð, unnu nemendur að hugmyndum, hönnun og útfærslu á vélmenni sem á að flytja tvö egg frá A til B með mögulegri hindrun. Í Noregi var komið að því að byggja og setja saman vélmennið. Nemendur notuðu ýmis efni til byggingar og má þar nefna t.d. þrívíddarprentara. Nemendur kynntu síðan sitt vélmenni fyrir hópnum og það var skemmtilegt að sjá hvað útfærslur nemenda voru mismunandi þrátt fyrir sama lokamarkmið. Nemendur og kennarar fengu síðan kynningu á bænum Tonsberg. Til þess að kynna Tonsberg útbjuggu norsku nemendurnir skemmtilegan ratleik fyrir okkur og voru með fræðslu á helstu stöðum. Skemmtileg leið til þess að kynna sinn heimabæ. Nemendum var einnig boðið á Edvard Munch safnið þar sem nemendur fengu leiðsögn um safnið ásamt því að fá að prufa að búa til sína eigin klippimynd í stíl expressionisma. Frábær ferð í alla staði!

Í dag fékk Njarðvíkurskóli afhentan Grænfánann í sjöunda sinn við hátíðlega athöfn. Grænfáninn er afhentur skólum sem leggja áherslu á umhverfismennt og menntun til sjálfbærni. Njarðvíkurskóli vinnur samkvæmt umhverfisstefnu Reykjanesbæjar. Meginmarkmið með umhverfismennt er að auka þekkingu og virðingu nemenda fyrir umhverfi sínu og skapa jákvætt viðhorf nemenda og starfsmanna til umhverfismála. Með aukinni þekkingu á umhverfismálum og jákvæðu viðhorfi nemenda og starfsmanna er auðveldara að fá þau til að flokka sorp og ganga betur um náttúruna. Nemendur og starfsfólk skólans hafa verið að taka sig á í umhverfismálum síðustu ár.

Bjarni Fritzson kom í dag í Njarðvíkurskóla og las fyrir nemendur í 2.-7. bekk. Bækurnar sem Bjarni las úr voru Orri óstöðvandi - Jólin eru að koma og Salka – Hrekkjavakan. Mikil ánægja var með upplestur Bjarna. Orri óstöðvandi: Jólin eru að koma Um bókina: Magga fékk að verja jólunum heima hjá mér og útkoman var rosaleg. Við lentum í snældubrjáluðum Jólahatara sem reyndi að skemma jólin fyrir allri götunni og svo voru foreldrar mínir hársbreidd frá því að aflýsa jólunum. Ég get ekki sagt meira en þetta er rosalegasta jólabók allra tíma, sérhönnuð til þess að koma þér í alvöru jólagír.Magga fékk að verja jólunum heima hjá mér og útkoman varð vægast sagt svakaleg. Við lentum í snældubrjáluðum Jólahatara sem reyndi að skemma jólin fyrir allri götunni og svo munaði minnstu að jólagóðmennska okkar Möggu yrði einhverjum að bana. Foreldrar mínir voru líka hársbreidd frá því að aflýsa jólunum og ógurlegur öryggisvörður sigaði sérsveitinni á mig. Magga tókst á við sinn stærsta ótta og við urðum að kenna grautfúlum Valsstrákunum lexíu í flughálum lokabardaga. Ég vil alls ekki ljóstra of miklu upp en þetta er rosalegasta jólabók allra tíma, sérhönnuð til þess að koma þér í alvöru jólagír. Salka - Hrekkjavakan Um bókina: Í tilefni af hrekkjavökunni setti TikTok-stjarnan Gabbi Galdur af stað #graskeraáskorun. Við vinirnir ákváðum að taka þátt enda VIP-boðsmiði í hræðilegasta draugahús Íslandssögunnar í boði og það á sjálfri hrekkjavökunni. Sú ákvörðun átti eftir að verða okkur dýrkeypt og hrinti af stað einni svakalegustu atburðarás lífs míns. Í tilefni af hrekkjavökunni setti Gabbi Galdur, frægasta TikTok-stjarna Íslands, af stað #graskeraáskorun. Við vinirnir ákváðum að taka þátt enda elskum við að bregða fólki og svo voru verðlaunin svakaleg: VIP-boðsmiði í hræðilegasta draugahús Íslandssögunnar og það á sjálfri hrekkjavökunni. Sú ákvörðun átti eftir að verða okkur dýrkeypt og hrinti af stað einni svakalegustu atburðarás lífs míns. Ég get alls ekki sagt þér meira og er í raun búin að segja þér alltof mikið, en ef þú elskar hræðilega hrekkjavöku-hrekki, TikTok og alvöru spennutrylli, þá er þetta bókin fyrir þig.

Fimmtudaginn 23. nóvember er starfsdagur í Njarðvíkurskóla. Allir nemendur eiga frí þennan dag. Frístundaheimili yngri nemenda og frístund í Ösp er lokað þennan dag. Thursday the 23rd. of November is a teachers work day in Njarðvíkurskóli. All students have a vacation this day. The after school program is closed this day. Czwartek, 23 Listopada, jest dniem pracy nauczycieli w Njardvikurskoli. Wszyscy uczniowie maja w tym dniu wakacje. Tego dnia zajecia pozalekcyjne sa zamkniete.

Foreldrafélag Njarðvíkurskóla verður með jólaföndur í sal skólans miðvikudaginn 29. nóvember frá kl. 17:00 til 18:30. Foreldrafélagið býður upp á fjölbreytt efni fyrir skapandi börn og fullorðna. Nemendur í 10. bekk munu selja veitingar. Við mælum með að taka með sér skæri, lím og liti og nokkra klósettpappírshólka. Ekki gleyma jólapeysunni. Öll velkomin. ----- The Njarðvíkurskóli parents' association announces its Christmas craft gathering on Wednesday November 29th from 17:00 until 18:30 in the school hall. The parents' association offers a variety of materials for children's and parents' creative Christmas crafts and the pupils of the 10th grade will offer snacks for sale. We recommend that you bring scissors, glue, crayons/color markers and a few empty toilet paper rolls. And don't forget the Christmas sweater. All welcome.