Fréttir

Opnað hefur verið fyrir umsóknir í vetrarfrístund skólaárið 2024-2025. Sótt er um í gegnum mittreykjanes.is og sækja þarf um fyrir 31. maí. Nánari upplýsingar eru á heimasíðu Reykjanesbæjar á þessari slóð: https://www.reykjanesbaer.is/is/moya/news/opnad-fyrir-umsoknir-i-vetrarfristund

Mánudaginn 29. apríl var Litla upplestrarkeppnin haldin hátíðleg á sal Njarðvíkurskóla. Keppnin hefst ár hvert á degi íslenskrar tungu 16. nóvember og lýkur að vori. Þátttakendur eru nemendur í 4. bekk. Litla upplestrarkeppnin hófst í Hafnarfirði haustið 2010 og byggir á markmiðum Stóru upplestrarkeppninnar sem haldin er árlega í 7. bekk. Meginmarkmið keppninnar er að nemendur flytji íslenskt mál sjálfum sér og öðrum til ánægju og að þeir hafi vandvirkni og virðingu að leiðarljósi við flutninginn. Keppnishugtakið felur eingöngu í sér það markmið að keppa við sjálfan sig, að verða betri í dag enn í gær. Nemendur hafa því æft undir handleiðslu umsjónarkennara sinna í vetur. Í upphafi á hátíðinni las Rósa Kristín Jónsdóttir ljóð en hún sigraði í Stóru upplestrarkeppninni. Forráðamönnum nemenda, nemendum í 3. bekk og öðrum gestum var boðið að koma á sal og fylgjast með. Nemendur í 4. bekk tóku þátt og lásu upp margskonar texta, bæði ljóð og sögur hvort sem það var sem einstaklingur eða hluti af hóplestri. Fyrir marga nemendur var þetta stórt skref að standa fyrir framan stóran hóp og lesa upp og stóðu því allir nemendur sig eins og hetjur. Að lokum fengu nemendur afhent viðurkenningaskjöl fyrir þátttöku í keppninni.

Dagana 16.-18. apríl sl. voru þemadagar í Njarðvíkurskóla og var þemað, Njarðvíkurskóli verður barnasáttmálinn. Hver árgangur skólans fékk úthlutað tvær til þrjár greinar Barnasáttmálans sem þeir unnu svo með og úfærðu hver á sinn hátt út frá efni þemans. Yngri nemendur unnu líka út frá barnasáttmálanum á barnvænu máli, þ.e. einfaldara máli svo börn eigi auðveldar með að skilja og átta sig á hvað þetta þýðir. Öll mannréttindi barna eru jafn mikilvæg og þau tengjast. Mikilvægt er að þekkja réttindi sín vel og þekkja líka réttindi annarra barna. Nemendur buðu forráðamönnum og öðrum gestum á sýningu 18. apríl til að sjá afrakstur á vinnu þeirra frá þemadögum.

Nemendur í 4. bekk höfðu tækifæri til að taka þátt í teiknisamkeppni 4. bekkinga en um er ræða keppni sem haldin er í tengslum við Alþjóðlega skólamjólkurdaginn ár hvert. Ásmundur Einar Daðason, mennta- og barnamálaráðherra, tók þátt í valinu á verðlaunamyndunum og hafði hann sérstaklega orð á því hve gaman væri að sjá vinnuna og metnaðinn sem nemendur leggja í myndir sínar. Yfir 1.200 myndir bárust í keppnina frá 70 skólum um land allt. Verðlaunahöfum eru veitt viðurkenningarskjöl fyrir teikningar sínar og til viðbótar er hver mynd verðlaunuð með 40.000 kr. peningagjöf frá Mjólkursamsölunni. Verðlaunaféð rennur óskipt í bekkjarsjóð teiknaranna og getur bekkurinn nýtt þá upphæð í að gera sér glaðan dag saman og efla liðsheild í samráði við umsjónakennara og skólastjórnendur – sjá www.skolamjolk.is Hjörtur Snær Sigurðsson nemandi í 4. bekk í Njarðvíkurskóla var einn af verðlaunahöfum og óskum við honum innilega til hamingju með viðurkenninguna.

Skóladagatal Njarðvíkurskóla fyrir skólaárið 2024-2025 hefur verið birt og hægt er að nálgast það hér. Dagatalið hefur verið samþykkt af starfsfólki skólans, skólaráði og hjá menntaráði Reykjanesbæjar. Útskýring á skóladagatali fyrir skólaárið 2024-2025 Starfstími nemenda í grunnskóla er á hverju skólaári að lágmarki níu mánuðir og eiga skóladagar nemenda að vera eigi færri en 180. Fjöldi skóladaga nemenda er lögbundinn. Skóladagar nemenda eru á tímabilinu 20. ágúst til 10. júní. Skipting milli kennsludaga og annarra skóladaga nemenda er á ábyrgð skólastjóra með samþykki frá starfsmönnum í Njarðvíkurskóla, skólaráði Njarðvíkurskóla og fræðsluráði Reykjanesbæjar. Hérna er útskýring á uppbrotsdögum, skertum skóladögum, starfsdögum og vetrarleyfi: Uppbrotsdagar eru einstaka skóladagar þar sem stundatöflu nemenda er breytt verulega en upphaf og lok skóladags er því næst þau sömu. Uppbrotsdagar eru nýttir til óhefðbundins skólastarfs s.s. þemadaga og íþróttadaga. Uppbrotsdagar geta mest orðið 10 dagar á skólaárinu. Í Njarðvíkurskóla verða átta uppbrotsdagar á skólaárinu 2024-2025 og eru þeir tilgreindir með (U) á skóladagatalinu. Frístundaheimili í Njarðvíkurskóla og Ösp eru opin á uppbrotsdögum. - Uppbrotsdagar á skólaárinu eru: Föndurdagur (11. desember), þemadagar (19., 20. og 21. febrúar), íþróttadagur (30. apríl) og útinám og ferðir (3., 4. og 5. júní). Skertir skóladagar nemenda teljast ekki til uppbrotsdaga og geta verið tíu talsins. Með skertum skóladögum m.a. átt við skólasetningar- og skólaslitadaga, samtalsdaga og annað sem skólastjóri ákveður í hverjum skóla. Í Njarðvíkurskóla verða tíu skertir skóladagar á skólaárinu 2024-2025 og eru þeir tilgreindir með bláum lit á skóladagatalinu. - Frístundaheimili í Njarðvíkurskóla og Ösp eru opin á eftirfarandi skertum skóladögum: Samtalsdagar (8. október og 28. janúar), vináttudagur (8. nóvember), öskudagur (5. mars), námsmatsdagur (14. maí) og vorhátíð (30. maí). - Frístundaheimili í Njarðvíkurskóla og Ösp eru lokuð á eftirfarandi skertum skóladögum: Skólasetning (23. ágúst), jólahátíð (20. desember), árshátíð (4. apríl) og skólaslit (6. júní). Vetrarleyfi er dagana 25. október, 28. október og 7. mars. Engin kennsla er þessa daga og frístundaheimilin eru lokuð. Vetrarleyfisdagar eru tilgreindir með appelsínugulum lit á skóladagatalinu. Starfsdagar eru fimm á starfstíma nemenda. Engin kennsla er þessa daga og frístundaheimilin eru lokuð. Starfsdagar er tilgreindir með gulum lit á skóladagatalinu. - Starfsdagar á skólaárinu eru: 25. september, 21. nóvember, 13. janúar, 6. mars og 2. júní. Við gerð skóladagatala er reynt að dreifa uppbrotsdögum, skertum nemendadögum, vetrarleyfisdögum og starfsdögum á vikudagana yfir skólaárið.

Keppnislið Njarðvíkurskóla í Skólahreysti endaði í 9. sæti í riðli 2 í ár. Lið Njarðvíkurskóla skipuðu Nikolai Leo Jónsson, Hólmfríður Eyja Jónsdóttir, Sara Björk Logadóttir og Oskar Patryk Szacon. Varamenn eru Almar Orri Jónsson og Kristín Björk Guðjónsdóttir. Almar Orri Jónsson og Kristín Björk Guðjónsdóttir voru varamenn. Nikolai Leo setti skólamet í upphýfingum þegar hann tók 36 upphýfingar. Hann bætti eigið met um eina upphýfingu frá því í fyrra. Liðið stóð sig með prýði og voru vel studd áfram af fjölmörgum og eldhressum áhorfendum frá Njarðvíkurskóla.

Í dag kl. 17:00 keppir lið Njarðvíkurskóla í Skólahreysti í Laugardalshöll. Nikolai Leo Jónsson, Hólmfríður Eyja Jónsdóttir, Sara Björk Logadóttir og Oskar PatrykSzacon. Varamenn eru Almar Orri Jónsson og Kristín Björk Guðjónsdóttir Allir eru velkomnir á keppnina en keppnin verður einnig sýnd í beinni útsendingu á RÚV. Hvetjum alla til að fylgjast með, Áfram Njarðvíkurskóli!

Þemadagar verða í Njarðvíkurskóla dagana 16.-18. apríl. Þemað í ár er Barnasáttmáli Sameinuðu þjóðanna- Njarðvíkurskóli verður Barnasáttmálinn. Skóladagur nemenda er brotinn upp en er frá kl. 8:15-13:20 þessa daga og frístundaheimilin taka við að því loknu hjá þeim sem þar seru skráðir. Frekari upplýsingar um skipulag hvers árgangs koma frá umsjónarkennara. Fimmtudaginn 18. apríl er forráðamönnum, aðstandendum og öðrum gestum boðið að koma í skólann frá 12:40-13:20 til að sjá afrakstur þemadaga og hlökkum við til að sjá sem flesta.

Páskafrí hefst mánudaginn 25. mars. Kennsla hefst aftur þriðjudaginn 2. apríl samkvæmt stundaskrá. Við vonum að allir hafi það gott í fríinu og mæti að því loknu fullir orku til að takast á við síðasta hluta skólaársins. Gleðilega páska.

Árshátíð Njarðvíkurskóla var haldin 21. mars fyrir troðfullu húsi. Mikið var um flott atriði sem Ragna Talía Magnúsdóttir, Patrekur Atlason og Hafþór Nói Hjaltason, kynntu til leiks. Nemendur sýndu dansa, leikþætti og söng. Alls voru tíu atriði sýnd sem öll vöktu mikla lukku hjá troðfullu íþróttahúsinu af nemendum, starfsmönnum, forráðamönnum og öðrum gestum. Eftir árshátíðina fóru allir yfir í skóla þar sem boðið var uppá skúffuköku og gos. Frábær dagur í alla staði og eiga nemendur og starfsmenn þakkir fyrir skemmtileg atriði og árshátíðarnefndin og nemendur sem unnu viðhátíðina fyrir frábæran undirbúning og skipulag. Einnig þakkar Njarðvíkurskóli starfsmönnum í íþróttahúsi fyrir frábæra aðstoð. Nemendur sem unnu að hátíðinni voru: Kristján Freyr Davíðsson, Viktor Garri Guðnason, Frosti Kjartan Rúnarsson, Kristinn Einar Ingvason, Kacper Agnar Kozlowski, Hafþór Nói Hjaltason, Patrekur Atlason, Ragna Talía Magnúsdóttir, Hólmfríður Eyja Jónsdóttir, Jökull Ólafsson, Matthildur Mía Halldórsdóttir, Oskar Patryk Szacon, Sara Björk Logadóttir, Svala Gautadóttir, Kristín Björk Guðjónsdóttir og Hulda María Agnarsdóttir.