Fréttir

Opnað hefur verið fyrir umsóknir í frístundaheimili grunnskólanna fyrir 1. – 4. bekkinga skólaárið 2025 – 2026. Sótt er um í gegnum www.mittreykjanes.is, þar er hlekkur í umsóknarkerfi sem heitir Vala frístund. Inn í Völu geta foreldrar séð allt sem tengist umsókninni. Nánari upplýsingar eru á heimasíðu Reykjanesbæjar.

Miðvikudagurinn 14. maí er skertur nemendadagur í Njarðvíkurskóla. Nemendur í 1.-6. bekk mæta 8:15 og skóla lýkur 10:35. Frístundaheimili skólans tekur þá við hjá þeim nemendum sem eru skráðir þar. Nemendur eru hjá umsjónarkennara í heimastofum þessa tíma og unnið er að námsmati auk annars. Nemendur í 7.-10. bekk mæta kl. 8:15 í lokapróf eftir próftöflu sem er á heimasíðu skólans. Nemendur í 7. og 8. bekk taka stærðfræðipróf og nemendur í 9. og 10. bekk taka íslenskupróf. Nemendur hafa próftíma til kl. 10:00 og lýkur skóladeginum þá. Hefðbundinn skóladagur er hjá nemendum í Ösp sem og frístundastarf þennan dag.

Keppnislið Njarðvíkurskóla í Skólahreysti tók þátt í skólahreysti og endaði í 4. sæti í sínum riðli í ár. Lið Njarðvíkurskóla skipuðu þau Kristinn Einar Ingvason, Karen Ósk Lúthersdóttir, Logi Örn Logason og Hafdís Inga Sveinsdóttir. Dagbjört Dóra Kristmannsdóttir og Viktor Leó Elísasson voru varamenn. Hafdís Inga setti glæsilegt skólamet í að hanga á slá þar sem hún hékk í 11 mínútur og 11 sekúndur, með því bætti hún met með systur sinnar Elvu Lísu frá árinu 2013 um þrjár sekúndur. Þá tók hún líka þátt í armbeygjum og gerði 32 slíkar. Logi Örn tók þátt í upphýfingum og dýfum þar sem hann var með 26 upphýfingar og 14 dýfur. Þá tóku Kristinn Einar og Karen Ósk þátt í þrautabraut þar sem þau kláruðu brautina á 3 mínútum og 3 sekúndum. Liðið stóð sig því með prýði og voru vel studd áfram af fjölmörgum og eldhressum áhorfendum frá Njarðvíkurskóla.

Það var líf og fjör í Njarðvíkurskóla í dag, 30. apríl, en þá fór fram árlegur íþróttadagur skólans. Íþróttadagurinn fer þannig fram að allir bekkir skólans keppa í ýmsum þrautum. Þrautirnar í ár voru bæði hefðbundnar og óhefðbundnar. Hver bekkur var með sinn lit og setti það skemmtilegan brag á daginn. Að lokum var íþróttabekkur Njarðvíkurskóla krýndur en það er sá bekkur sem fékk flest stig í keppnum dagsins. Í ár voru það nemendur í 10. ÞBI sem unnu bikarinn góða. 8. US endaði í 2. sæti og 9.HH í 3. sæti.

Líkt og undanfarin ár setjum við upp próftöflu fyrir yfirlitspróf í íslensku, stærðfræði og ensku fyrir 7.-10. bekk. Á meðfylgjandi mynd má sjá próftöflu ásamt því hvaða daga sjúkrapróf eru fyrir þessi próf.

Stóri Plokkdagurinn í Njarðvíkurskóla var tekinn með trompi föstudaginn 25.apríl og tvær fyrstu kennslustundir föstudagsins fóru í þetta verkefni. Nemendur og starfsfólk sameinuðust í því að plokka allt rusl í nærumhverfi skólans með góðum árangri. Dugnaður og drifkraftur hjá þessu flotta fólki var til fyrirmyndar og gaman að geta tekið þátt í þessu landsátaki með svo kraftmiklum hætti.

Frístundaheimili grunnskólanna (Sumarfrístund), fyrir tilvonandi 1. bekkinga (börn fædd 2019), verða opin frá 11. ágúst til skólasetningar. Markmiðin með þessari opnun eru m.a. að brúa bilið milli leik- og grunnskólagöngu nemenda, að aðlögun nýrra leikskólabarna geti hafist sem fyrst að hausti og að aðlaga tilvonandi 1. bekkinga í grunnskólann sinn.

Páskafrí í skólanum hefst mánudaginn 14. apríl. Kennsla hefst aftur samkvæmt stundaskrá þriðjudaginn 22. apríl. Við óskum öllum nemendum og forráðamönnum gleðilegra páska og vonum að þið njótið vel yfir hátíðarnar. Við hlökkum til að taka á móti öllum endurnærðum og tilbúnum í lokasprett skólaársins.

Skóladagatal Njarðvíkurskóla og Ösp fyrir skólaárið 2025-2026 hefur verið birt og hægt er að nálgast það hér. Dagatalið hefur verið samþykkt af starfsfólki skólans, skólaráði og hjá menntaráði Reykjanesbæjar.

Glæsileg árshátíð Njarðvíkurskóla var haldin þann 4. apríl. Þema árshátíðarinnar í ár var „Árið okkar", sem var sama þema og hafði verið á þemadögum fyrr í vetur. Nemendur fluttu atriði sem tengdust þeirra fæðingarári og voru atriðin fjölbreytt í ár og höfðu nemendur og kennarar þeirra lagt á sig mikla vinnu við að undirbúa sín atriði. Líkt og áður voru það nemendur skólans sem voru í öllum helstu lykilhlutverkum þannig að nemendur úr 9. og 10. bekk voru kynnar, hljóð- og ljósamenn sem og sviðsmenn og ber að hrósa þeim nemendum sem tóku það hlutverk að sér fyrir frábæra vinnu og samvinnu í ár. Árshátíðin var haldin í íþróttahúsi skólans sem var búið að umbreyta í frábæran leik- og tónlistarsal. Að lokinni árshátíð var boðið upp á skúffuköku og drykki í boði foreldrafélags Njarðvíkurskóla í skólanum þar sem forráðamenn gátu skoðað afrakstur þemadaga frá því fyrr í vetur. Foreldrar og gestir voru sammála um að árshátíðin hefði verið einstaklega vel heppnuð og endurspeglað vel þann góða anda sem ríkir í Njarðvíkurskóla. Hér má sjá nokkrar myndir frá árshátíðinni og fleiri myndir munu koma síðar