Fréttir

Mánudaginn 17. nóvember er starfsdagur í Njarðvíkurskóla. Allir nemendur eiga frí þennan dag. Frístundaheimili yngri nemenda og frístundaheimili í Ösp eru lokuð þennan dag.

Föstudaginn 31. október síðastliðin var Hrekkjavökuhátíð í Njarðvíkurskóla. Hefðbundin kennsla var brotin upp hluta af degi þar sem nemendur gátu farið á milli fjölbreyttra stöðva þar sem ýmislegt var brallað. Meðal annars var hægt að blanda eiturdrykki, fara í Just dance, skoða nornakistil, leysa hrekkjavökugátur og breakout og margt fleira skemmtilegt og hræðilegt. Dagurinn endaði svo á sal þar sem nemendur úr nemendaráði voru búin að skreyta salinn í stíl við Hrekkjavöku og sungu og dönsuðu við lög tengdri Hrekkjavökunni. Nemendur og starfsfólk mættu klædd í stíl við daginn og eins og má sjá á myndum hér að neðan var mikið fjör á þessum degi.

Fimmtudaginn 23. október síðastliðin fóru tveir nemendur úr Ösp, Lena Dominica og Hjálmar Bernhard, ásamt Helgu Ólínu kennara sínum og tóku á móti veglegum styrk sem Ösp fékk úthlutað frá bílaleigunni Blue. Blue heldur árlega Góðgerðarfest og var Ösp eitt af þeim málefnum sem hlutu styrk í ár. Það er mikilvægt fyrir Ösp að finna fyrir velvild í samfélaginu og hljóta slíkan styrk sem eflir enn frekar það öfluga starf sem á sér stað í Ösp. Ösp er sérhæft námsúrræði fyrir fatlaða nemendur í Reykjanesbæ sem eru í brýnni þörf fyrir einstaklingsmiðað og mjög sérhæft námsumhverfi og kemur þessi styrkur því að verulega góðum notum. Njarðvíkurskóli þakkar kærlega fyrir þessa frábæru gjöf.

Njarðvíkurskóli fékk í dag frábæra gjöf frá ættingjum Garðars Magnússonar, skipstjóra og útgerðarmanns frá Höskuldarkoti í Njarðvík. Garðar lést 10. október 2025, 95 ára gamall. Það var ósk Garðars að Njarðvíkurskóli fengi að gjöf sex uppstoppaða fugla og ísbjarnarham. Rafn Markús Vilbergsson skólastjóri ásamt níu nemendum úr 6. bekk heimsóttu í dag Þorbjörgu Garðarsdóttur dóttur Garðars og veittu gjöfinni viðtöku. Njarðvíkurskóli vill færa ættingjum Garðars Magnússonar þakkir fyrir þessa dýrmætu og merku gjöf sem á eftir að gleðja og fræða nemendur Njarðvíkurskóla um ókomin ár.

Nemendur úr áttunda bekk Njarðvíkurskóla tóku þátt í stuttmyndasamkeppninni Sexan forvarnarverkefni Neyðarlínunnar á síðasta skólaári og unnu samkeppnina. Sigurliðið fékk síðan sérstakt tækifæri til að sýna verk sitt á alþjóðlegri Barnakvikmyndahátíð sem fram fór í Bíó Paradís í Reykjavík. Sexan er forvarnarverkefni þar sem ungt fólk fræðir ungt fólk um mikilvæg málefni sem varða öryggi og líðan ungmenna. Þátttakendur búa til efni sem á að hafa áhrif á jafnaldra sína og koma mikilvægum skilaboðum á framfæri á áhrifaríkan og skapandi hátt. Sigurliðið samanstóð af sjö nemendum: Sóldísi, Elísu, Viktoríu, Helenu, Arnóri, Andrési og Karen Gígju. Þessi hópur vann vel saman og sýndi fram á að með samvinnu, sköpunargleði og mikilli vinnu er hægt að ná góðum árangri. Myndbandið sem þau bjuggu til vakti mikla athygli. Að vera valin til að kynna verk sitt á alþjóðlegri Barnakvikmyndahátíð er gríðarleg viðurkenning fyrir nemendurna. Hátíðin í Bíó Paradís er þekkt fyrir að sýna hágæða kvikmyndaverk frá börnum og ungmennum um allan heim. Að fá að vera hluti af þessum viðburði og deila verkinu sínu var ómetanleg reynsla fyrir nemendurna. Hér fyrir neðan má sjá mynd af hluta af sigurliði Njarðvíkurskóla sem fór á sýninguna í Bíó Paradís.

Föstudaginn 31. október verður haldin Hrekkjavökuhátíð í Njarðvíkurskóla. Þetta er uppbrotsdagur samkvæmt skóladagatali og verður hluti af deginum helgaður hrekkjavökunni. Við ætlum að búa til hrekkjavökustemningu í skólanum þar sem nemendur taka þátt í fjölbreyttum viðburðum og stöðvum. Á meðal þess sem verður í boði eru skapandi og dularfullar stöðvar í kennslustofum, hrekkjavökuleikir og þrautir, draugalegt diskó, söngur, tónlist og önnur fjölbreytt hrekkjavökuverkefni. Kennsla fer fram samkvæmt stundaskrá frá kl. 8:15 til 10:35 og skipulögð hrekkjavökudagskrá frá kl. 10:35 til 13:20. Frímínútur og hádegismatur verða á hefðbundnum tímum. Frístundaheimili verður með hefðbundnu sniði. Nemendur fara ekki í sund þennan dag en íþróttir verða samkvæmt stundaskrá til kl. 10:35 og verður tekið tillit til búninga í þeirri kennslu. Við hvetjum nemendur til að mæta í búningum eða einhverju sem tengist hrekkjavöku. Salurinn í skólanum verður skreyttur í hrekkjavökuanda og munu nemendur taka þátt í söng og dansi. Mikilvægt er að nemendur komi klæddir eftir veðri þar sem þeir fara út í frímínútur líkt og aðra daga. Við hlökkum til dagsins þar sem nemendur og starfsfólk mun njóta saman hrekkjavökustemningar í skólanum.

Föstudaginn 17. október og mánudaginn 20. október er vetrarleyfi í Njarðvíkurskóla. Engin kennsla fer fram þessa daga og frístundaheimili skólans, bæði í skólanum og í Ösp, verða lokuð. Vonast er til að öllum líði vel í vetrarleyfinu.

Nemendur í 8.-10. bekk sem völdu fjallgönguval gengu á Helgafell á dögunum eftir að hafa undirbúið sig með styttri göngum í nærumhverfinu. Fjallgönguvalið er undir stjórn Heiðrúnar Rósar íþróttakennara. Ákveðið var að nýta sér gott veður þriðjudaginn 7. október síðastliðin til þess að komast úr nærumhverfi skólans og eins og áður sagði gengu nemendur með kennurum á Helgafell. Með í för í göngunni á Helgafell var einnig Þórir Rafn íþróttakennari sem veitti hópnum stuðning. Að sögn kennara gekk ferðin vel og nemendur sýndu mikinn dugnað á leiðinni upp og komu allir glaðir heim eftir að hafa sigrast á fellinu líkt og má sjá á meðfylgjandi myndum.

Rithöfundurinn Ævar Þór Benediktsson kom í heimsókn í Njarðvíkurskóla í dag, 3. október, og hitti nemendur í 4.-7. bekk á sal skólans. Ævar las upp úr nýjustu bók sinni, Skólastjórinn, ásamt því að ræða einnig aðrar bækur sem hann hefur skrifað við áhugasama nemendur. Heimsóknin vakti mikla lukku meðal nemenda sem fengu tækifæri til að kynnast höfundinum og verkum hans nánar. Í lok heimsóknarinnar fengu nemendur að spyrja Ævar spurninga, og spunnust út frá því fjörlegar og skemmtilegar umræður. Heimsóknin var liður í að efla lestraráhuga nemenda og kynna þeim fyrir íslenskum bókmenntum.

Miðvikudaginn 8. október er samtalsdagur í Njarðvíkurskóla. Forráðamenn bóka viðtal við umsjónarkennara í gegnum Mentor. Opnað verður fyrir bókanir 1. október um kl. 10:00 og geta forráðamenn þá bókað sín viðtöl. Þeir forráðamenn sem eru með túlk í viðtalinu fá úthlutað tímum frá umsjónarkennurum og fá tölvupóst á næstu dögum með tímasetningunum. Viðtöl fara fram í heimastofum nemenda. Þeir forráðamenn sem óska eftir viðtali við fag-, list- og verkgreinakennara, sem einnig eru til viðtals þennan dag, hafa samband við skrifstofustjóra skólans og bóka þau viðtöl. Hægt er að hringja í síma 420-3000 eða senda póst á njardvikurskoli@njardvikurskoli.is. Óski forráðamenn eftir að hafa samtalið á TEAMS þá þarf að senda póst á umsjónarkennara og óska eftir slíku viðtali en mikilvægt er þó að nemandinn sé einnig í viðtalinu. Grunnurinn í viðtalinu er könnun um líðan og almennt gengi nemenda í skólanum sem nemendur svara heima með forráðamönnum og er könnun svarað rafrænt. Tengill á könnunina er: www.njardvikurskoli.is/is/samskiptadagur og mikilvægt er að svara fyrir hvert barn og velja réttan tengil eftir árgangi. Mikilvægt er að könnuninni sé svarað sem fyrst. Nemendur eiga að mæta með forráðamönnum sínum í viðtalið. Frístundaheimili skólans og í Ösp eru opin á samtalsdeginum frá kl. 8:15-16:15. Á samtalsdeginum verða fulltrúar með kynningu frá fjölmörgum íþrótta- og tómstundafélögum í Reykjanesbæ á sal skólans. Við hvetjum forráðamenn til að staldra við, kynna sér úrvalið og sjá hvaða tækifæri standa börnum og ungmennum til boða í Reykjanesbæ.