Fréttir

Föstudaginn 12. desember verður uppbrotsdagur í Njarðvíkurskóla þar sem hefðbundið skólastarf víkur fyrir fjölbreyttri dagskrá í tengslum við aðventuna. Nemendur í 1.-4. bekk verða í skólanum frá kl. 8:15-13:20 og nemendur í 5.-10. bekk frá kl. 8:15-14:00. Frístundaheimili Njarðvíkurskóla og Ösp verða opin frá kl. 13:20 til 16:15 þennan dag. Í skólanum er hefð fyrir því að nemendur og starfsfólk eigi saman ánægjulega og notalega stund við jólaföndur og skreytingar þar sem skólabyggingin er sett í hátíðlegan jólabúning. Sama dag verður jafnframt árlegur hátíðarmatur í skólanum. Salurinn verður skreyttur og starfsfólk mun þjóna nemendum til borðs. Þetta er ávallt hátíðleg og skemmtileg stund sem nemendur njóta vel. Í boði verður eftirfarandi: - Hátíðarmatur - Kalkúnn með salvíu, steiktum kartöflum, hátíðarsósu, eplasalati og ísblóm. - Hátíðarmatur/Veganréttur - Vegan Wellington með steiktum kartöflum, hátíðarsósu, eplasalati og ís. - Meðlæti - Rauðkál, gular baunir og úrval af grænmeti.

Á aðventunni hefur sú hefð skapast í Njarðvíkurskóla að taka á móti rithöfundum sem koma og lesa úr bókum sínum fyrir nemendur. Í ár tókum við á móti tveimur rithöfundum sem komu og lásu fyrir nemendur. Þetta voru þeir Bjarni Fritzson sem las fyrir 4.-7. bekk úr nýrri bók sinni úr bókaflokknum um Orra óstöðvandi og Möggu Messi og Gunnar Helgason sem las fyrir 3.-6. bekk úr nýrri bók eftir hann, Birtingur og símabannið mikla.

Starfsáætlun fyrir Njarðvíkurskóla, Björk og Ösp skólaárið 2025-2026 var samþykkt af skólaráði 22. október 2025 og í menntaráði Reykjanesbæjar 14. nóvember 2025. Samkvæmt 29 gr. grunnskólalaga ber hverjum grunnskóla að gefa út skólanámskrá og starfsáætlun. Skólastjóri er ábyrgur fyrir gerð þeirra og skal semja þær í samráði við kennara. Skólanámskrá er nánari útfærsla á Aðalnámskrá grunnskóla um markmið, inntak náms og námsmat, starfshætti og mat á árangri og gæðum skólastarfs. Skólanámskrá tekur mið af sérstöðu grunnskóla og aðstæðum og skal endurskoða reglulega.

Dagur íslenskrar tungu er 16. nóvember á fæðingardegi skáldsins Jónasar Hallgrímssonar en þar sem 16. nóvember er á sunnudegi í ár var hann haldinn í Njarðvíkurskóla þann 14. nóvember. Þessi árlegi viðburður er hefð í skólanum þar sem íslensku máli er gert enn hærra undir höfði en aðra daga og markar þessi dagur einnig upphafið að undirbúningi 7. bekkjar fyrir Stóru upplestrarkeppnina sem þau taka þátt í ár hvert og einnig hjá 4. bekk sem tekur þátt í Stóru upplestrarhátíðinni.

Foreldrafélag Njarðvíkurskóla verður með jólaföndur á sal Njarðvíkurskóla miðvikudaginn 19. nóvember frá kl. 17:30 til kl. 19:00. Í boði verður fjölbreytt úrval af skemmtilegu föndurefni fyrir bæði börn og fullorðna. Einnig verða styttur og jólakúlur til sölu gegn vægu gjaldi. Nemendur og forráðamenn eru hvattir til að taka með sér skæri, lím, liti og klósettpappírshólka. Við hvetjum öll til að mæta í jólalegum fötum og skapa skemmtilega stemningu saman. Öll hjartanlega velkomin.

Mánudaginn 17. nóvember er starfsdagur í Njarðvíkurskóla. Allir nemendur eiga frí þennan dag. Frístundaheimili yngri nemenda og frístundaheimili í Ösp eru lokuð þennan dag.

Föstudaginn 31. október síðastliðin var Hrekkjavökuhátíð í Njarðvíkurskóla. Hefðbundin kennsla var brotin upp hluta af degi þar sem nemendur gátu farið á milli fjölbreyttra stöðva þar sem ýmislegt var brallað. Meðal annars var hægt að blanda eiturdrykki, fara í Just dance, skoða nornakistil, leysa hrekkjavökugátur og breakout og margt fleira skemmtilegt og hræðilegt. Dagurinn endaði svo á sal þar sem nemendur úr nemendaráði voru búin að skreyta salinn í stíl við Hrekkjavöku og sungu og dönsuðu við lög tengdri Hrekkjavökunni. Nemendur og starfsfólk mættu klædd í stíl við daginn og eins og má sjá á myndum hér að neðan var mikið fjör á þessum degi.

Fimmtudaginn 23. október síðastliðin fóru tveir nemendur úr Ösp, Lena Dominica og Hjálmar Bernhard, ásamt Helgu Ólínu kennara sínum og tóku á móti veglegum styrk sem Ösp fékk úthlutað frá bílaleigunni Blue. Blue heldur árlega Góðgerðarfest og var Ösp eitt af þeim málefnum sem hlutu styrk í ár. Það er mikilvægt fyrir Ösp að finna fyrir velvild í samfélaginu og hljóta slíkan styrk sem eflir enn frekar það öfluga starf sem á sér stað í Ösp. Ösp er sérhæft námsúrræði fyrir fatlaða nemendur í Reykjanesbæ sem eru í brýnni þörf fyrir einstaklingsmiðað og mjög sérhæft námsumhverfi og kemur þessi styrkur því að verulega góðum notum. Njarðvíkurskóli þakkar kærlega fyrir þessa frábæru gjöf.

Njarðvíkurskóli fékk í dag frábæra gjöf frá ættingjum Garðars Magnússonar, skipstjóra og útgerðarmanns frá Höskuldarkoti í Njarðvík. Garðar lést 10. október 2025, 95 ára gamall. Það var ósk Garðars að Njarðvíkurskóli fengi að gjöf sex uppstoppaða fugla og ísbjarnarham. Rafn Markús Vilbergsson skólastjóri ásamt níu nemendum úr 6. bekk heimsóttu í dag Þorbjörgu Garðarsdóttur dóttur Garðars og veittu gjöfinni viðtöku. Njarðvíkurskóli vill færa ættingjum Garðars Magnússonar þakkir fyrir þessa dýrmætu og merku gjöf sem á eftir að gleðja og fræða nemendur Njarðvíkurskóla um ókomin ár.

Nemendur úr áttunda bekk Njarðvíkurskóla tóku þátt í stuttmyndasamkeppninni Sexan forvarnarverkefni Neyðarlínunnar á síðasta skólaári og unnu samkeppnina. Sigurliðið fékk síðan sérstakt tækifæri til að sýna verk sitt á alþjóðlegri Barnakvikmyndahátíð sem fram fór í Bíó Paradís í Reykjavík. Sexan er forvarnarverkefni þar sem ungt fólk fræðir ungt fólk um mikilvæg málefni sem varða öryggi og líðan ungmenna. Þátttakendur búa til efni sem á að hafa áhrif á jafnaldra sína og koma mikilvægum skilaboðum á framfæri á áhrifaríkan og skapandi hátt. Sigurliðið samanstóð af sjö nemendum: Sóldísi, Elísu, Viktoríu, Helenu, Arnóri, Andrési og Karen Gígju. Þessi hópur vann vel saman og sýndi fram á að með samvinnu, sköpunargleði og mikilli vinnu er hægt að ná góðum árangri. Myndbandið sem þau bjuggu til vakti mikla athygli. Að vera valin til að kynna verk sitt á alþjóðlegri Barnakvikmyndahátíð er gríðarleg viðurkenning fyrir nemendurna. Hátíðin í Bíó Paradís er þekkt fyrir að sýna hágæða kvikmyndaverk frá börnum og ungmennum um allan heim. Að fá að vera hluti af þessum viðburði og deila verkinu sínu var ómetanleg reynsla fyrir nemendurna. Hér fyrir neðan má sjá mynd af hluta af sigurliði Njarðvíkurskóla sem fór á sýninguna í Bíó Paradís.