Fréttir

Þemadagar í Njarðvíkurskóla Dagana 17., 18. og 19. desember eru jólaþemadagar í Njarðvíkurskóla með yfirskriftina " Samkennd, kærleikur og virðing". Þemadagar eru uppbrotsdagar þar sem hefðbundin stundaskrá er látin víkja og nemendur vinna verkefni í tengslum við þemað. Á þemadögunum hefst skóladagur hjá öllum nemendum kl. 8:15 í heimastofu. Sérgreinar og val fellur niður þessa daga, þar með talið íþróttir og sund. Tímasetningar eftir árgöngum: Þriðjudagur 17. desember 1.-4. bekkur – kl. 8:15-13:20 5.-10. bekkur – kl. 8:15-14:00 Miðvikudagur 18. desember 1.-4. bekkur – kl. 8:15-13:20 5.-10. bekkur – kl. 8:15-14:00 Fimmtudagur 19. desember 1.-10. bekkur – kl. 8:15-13:20

Í dag var aðventustund í Ytri-Njarðvíkurkirkju þar sem sr. Brynja Vigdís Þorteinsdóttir, Stefán H. Kristinsson organisti og Pétur Rúðrik Guðmundsson meðhjálpari tóku á móti nemendum og starfsmönnum. Þar áttu nemendur og starfsmenn hátíðlega stund.

Sigga Dögg kynfræðingur heimsótti Njarðvíkurskóla í dag. Hún las fyrir 8.-10. bekk upp úr nýjustu bókinni sinni Daði sem er sjálfstætt framhald bókarinnar KynVeru sem kom út 2018. Sagan um Daða fjallar um ungan dreng sem glímir við ástina, ástarsorg, sjálfsmyndina o.fl. Daði spilar sig svalan fyrir félögunum og stelpunni sem hann er skotinn í en undir yfirborðinu krauma mótsagnakenndar tilfinningar sem Daði reynir að átta sig á og vinna úr. Bókin byggir á algengum spurningum og umræðum drengja úr kynfræðslu Siggu Daggar. Njarðvíkurskóli þakkar Siggu Dögg fyrir heimsóknina.

Röskun á skólastarfi vegna óveðurs Þar sem veðurspá er frekar slæm næstu tvo daga þá biðjum við foreldra að skoða eftirfarandi verklagsreglur grunnskóla við óveðri. Þegar veðurspár gefa til kynna að óveður sé í aðsigi á Suðurnesjum fylgjast Lögreglan og Almannavarnir gaumgæfilega með, hafa samstarf við skólana og gefa út viðvaranir til almennings, gerist þess þörf. Mikilvægt er að foreldrar sjálfir fylgist með veðri og veðurspám og hagi sér í samræmi við aðstæður hverju sinni. Foreldrar leggja sjálfir mat á hvort fylgja þarf barni í og úr skóla þótt engin tilkynning hafi borist frá yfirvöldum. Meti foreldrar aðstæður svo að ekki sé óhætt að börn þeirra sæki skóla þá skulu þeir tilkynna skólanum um það og lítur skólinn á slík tilvik sem eðlileg forföll. Við slíkar aðstæður eru skólarnir opnir og þar er öruggt skjól fyrir börnin. Informacja dotycząca zakłóceń zajęć szkolnych z powodu niepogody. W przypadku jeżeli, prognoza pogody przewiduje mocne wiatry i wichury na terenie Suðurnesja, Policja i służby cywilne będą czuwały nad bezpieczeństwem obywateli. Służby te będą współpracowały ze szkołami oraz ostrzegały obywateli w razie potrzeby. Ważne jest, aby rodzice dzieci uczęszczających do szkół, obserwowali prognozę pogody i podejmowali samodzielnie decyzje w jaki sposób dziecko ma się udać do szkoły, zgodne z warunkami pogodowymi. W gestii samych rodziców należy ocena czy dziecko należy odprowadzić czy też przyprowadzić ze szkoły; pomimo braku odgórnych zaleceń od dyżurujących służb. W przypadku jeżeli, rodzice stwierdzą, że ze względów pogodowych, wysyłanie dziecka do szkoły jest niebezpieczne, należy ten fakt zgłosić telefonicznie do sekretariatu szkoły. Przypadek taki będzie traktowany jako zwykła nieobecność. W każdych warunkach pogodowych, szkoła pracuje normalnie i jest otwartym i bezpiecznym schronieniem dla dzieci.

Gunnar Helgason kom í Njarðvíkurskóla á þriðjudaginn og las upp úr nýjustu bókinni sinni Draumaþjófinum fyrir nemendur í 3.-8. bekk. Gunnar hefur á undanförnum árum sent frá sér fjölda gríðarvinsælla barnabóka. Fyrir Mömmu klikk! hlaut hann Íslensku bókmenntaverðlaunin og Bókaverðlaun barnanna hafa sex sinnum fallið honum í skaut. Hér skapar hann spánnýjan og spennandi söguheim sem auðvelt er að týna sér í. Mikil ánægja var með heimsókn Gunnars. Njarðvíkurskóli þakkar honum fyrir heimsóknina.

Sala á happdrættismiðum í árlegu jólahappdrætti Lionsklúbbs Njarðvíkur er hafin. Sölumenn happdrættismiða eru m.a. í Krossmóa og selja miða og þar er aðalavinningurinn, Toyota Aygo, til sýnis. Við upphaf sölunnar veitir Lionsklúbburinn styrki til félagsmála. Sérdeildin Ösp í Njarðvíkurskóla fékk 500.000 kr. styrk frá Lionsklúbbnum. Styrkinn á að nota við kaup á munum í skynörvunarherbergi og hreyfisal deildarinnar. Njarðvíkurskóli þakkar Lionsmönnum í Njarðvík kærlega fyrir hlýhug og gjafmildi í garð skólans og eiga nemendur í Ösp sem og nemendur Njarðvíkurskóla eftir að njóta góðs af.

Í síðustu viku heimsótti Þorgrímur Þráinsson nemendur í 10. bekk í Njarðvíkurskóla með fyrirlesturinn ,,Verum ástfangin af lífinu”. Fyrirlesturinn var hvatning til nemenda að láta drauma rætast með því að bera ábyrgð á eigin lífi, setja sér markmið, hafa trú á sjálfum sér til að ná markmiðunum og skipuleggja sig í samræmi við það. Þorgímur nær ávallt vel til nemenda í skólanum og þökkum við honum kærlega fyrir heimsóknina.

Frábær mæting var á árlegt jólaföndur foreldrafélags Njarðvíkurskóla sem var haldið á sal skólans í gær. Bæði nemendur og foreldrar mættu til að föndra myndir á kerti, skreyta piparkökur, útbúa jólakort og perla jólaskraut.

Í tilefni af árlegu eldvarnarátaki Landssambands slökkviliðs- og sjúkraflutningamanna heimsótti slökkviliðið 3. bekk í vikunni. Sýnd var ný teiknimynd sem fjallar um baráttu slökkviálfanna Loga og Glóðar við Brennu-Varg. Myndin byggir á fræðsluefni sem notað hefur verið í eldvarnarátakinu undanfarin ár. Einnig fengu börnin afhenda handbók um eldvarnir heimilisins og fleira fræðsluefni. Farið er yfir helstu atriði eldvarna á heimilinu með börnunum, svo sem um nauðsyn þess að hafa reykskynjara, slökkvitæki og eldvarnateppi á heimilinu. Reynslan sýnir að þessir fræðslufundir með börnunum eru mjög áhrifarík leið til að fá þau og foreldra þeirra til að efla eldvarnir heima fyrir. Að lokinni fræðslu í skólastofunni fóru nemendur út þar sem þau fengu að prufa að halda á brunaslöngu.

Bjarni Fritzson kom í gær í Njarðvíkurskóla og las upp úr nýjustu bókinni sinni Orri óstöðvandi fyrir 2.-7. bekk. Þetta er fyrsta bókin um þau Orra og Möggu en uppátækjum þeirra virðast engin takmörk sett og útkoman er bráðskemmtileg. Orri óstöðvandi er ofurhetjuútgáfan af Orra sem hann breytir sér í þegar hann þarf á hugrekki og sjálfstrausti á að halda. Hugmyndin að baki bókinni var að gera fyndna og spennandi bók sem væri í senn sjálfstyrkjandi fyrir lesandann. Bókin er með u.þ.b. 100 sérlega skemmtilegum myndum og ætti að höfða jafnt til stelpna og stráka frá aldrinum 9-13 ára.