Fréttir

Föstudagurinn 11. október verður bleikur dagur í Njarðvíkurskóla sem og á mörgum öðrum vinnustöðum en októbermánuður er helgaður baráttunni gegn krabbameinum hjá konum. Til að sýna baráttunni stuðning eru starfsfólk og nemendur hvattir til að mæta í skólann í einhverju bleiku þennan dag.

Vegna tilmæla frá Heimli og skóla varðandi öryggi nemenda og aðgengi að þeim innan skólans þá höfum við í Njarðvíkurskóla ákveðið eftirfarandi: Framvegis ef foreldrar/forráðamenn þurfa að ná til nemenda eða koma gögnum til þeirra á skólatíma meðan á kennslu stendur þá eiga foreldrar alltaf að gefa sig fram við skrifstofu skólans sem hefur samband við kennara viðkomandi nemanda. Þetta á ekki við um upphaf og lok skóladags þegar verið er að fylgja nemendum í skólann eða sækja.

Ólympíuhlaup ÍSÍ fór fram í Njarðvíkurskóla þriðjudaginn 1. október. Markmiðið með hlaupinu er að hvetja nemendur til þess að æfa hlaup og auka með því útiveru og hreyfingu. Jafnframt að kynna og skýra nauðsyn þess að hreyfa sig, reyna á líkama sinn og stuðla þannig að betri heilsu og vellíðan. Nemendur í Njarðvíkurskóla hlupu samtals 2151 km.

Í morgun heimsótti Edda Sif Pálsdóttir frá Landanum á RÚV íþróttatíma í Njarðvíkurskóla. Sólarhringsútsending Landans stendur nú yfir en Edda Sif Pálsdóttir er ein af fimm umsjónarmönnum sem eru á mikilli þeysireið um allt landið. Útsendingin er í tilefni af 300. þætti Landans á RÚV.

Skólaþjónusta Reykjanesbæjar býður uppá ýmis fræðslu- og meðferðarnámskeið sem miða að því að styrkja foreldra í uppeldishlutverki sínu og aðstoða börnin við að takast á við tiltekinn vanda. Ólík námskeið eru í boði og eru þau sérsniðin að ólíkum aldri og þörfum barnanna. Námskeiðin byggja á vel rannsökuðum aðferðum og allir leiðbeinendur hafa viðurkennda og löggilda fagmenntun. Hægt er að sjá hvaða námkeið eru í boði á heimasíðu Reykjanesbæjar. Sérstök athygli er vakin á námskeiðinu "Uppeldi barna með ADHD

Bifhjólasamtök Lýðveldisins Sniglar heimsóttu nemendur í 7.-10. bekk í Njarðvíkurskóla í gær og voru með forvarnarfræðslu er varðar léttbifhjól í 1 flokki (vespur) um notkun þeirra, öryggi, umferðareglur, hættur og fleira. Fræðslan var í samstarfi við Sjóvá og Samgöngustofu. Guðrún Ámundadóttir og Vilberg Kjartansson mættu fyrir hönd samtakana. Í fræðslunni var lögð mikil áhersla á að nota viðurkennda bifhjólahjálma og þar til gerðan búnað, fara eftir umferðareglunum, hvernig haga sér á göngustígum í kringum gangandi vegfarendur og reiðhjólafólk og gæta fylgsta öryggis. Eins var lögð áhersla á vera sjálfum sér og öðrum til fyrirmyndar í umferðinni.

Föstudaginn 30. ágúst var opnunarhátíð í húsnæði sérdeildarinnar Ösp við Njarðvíkurskóla í tilefni af afhendingu viðbyggingar við sérdeildina. Kjartan Már bæjarstjóri, fulltrúar frá bæjarstjórn, fræðsluskrifstofu og umhverfissviði voru viðstaddir. Auk þess sem velgjörðarmenn, byggingaverktakar og starfsfólk skólans voru á staðnum. Í maí var hafist handa við nýja viðbyggingu við sérdeildina Ösp við Njarðvíkurskóla. Viðbyggingin er um 282 m² sem mun breyta miklu í starfsemi deildarinnar. Einnig voru gerðar endurbætur að innan á núverandi byggingu sem er 336 m² að stærð – húsnæðið er því í heild 618 m². Jóhann Friðriksson, formaður bæjarráðs Reykjanesbæjar, hélt stutta tölu og framhaldi talaði Ásgerður Þorgeirsdóttir skólastjóri Njarðvíkurskóla til gesta. Í ræðu Ásgerðar sagði hún að gaman væri að fá að taka við þessari glæsilegu viðbyggingu sem ætti eftir að nýtast vel í því frábæra starfi sem unnið er í sérdeildinni. Sérdeildin Ösp var stofnuð árið 2002 þegar skólaúrræði vantaði fyrir nemendur sem gátu ekki nýtt sér almenna bekkjarkennslu. Deildin er hugsuð fyrir nemendur í 1.-10. bekk í grunnskólum Reykjanesbæjar sem þurfa á mjög sértæku námsúrræði að halda. Í Ösp eru skráðir í skólabyrjun 23 nemendur í 1.-10. bekk. Kristín Blöndal er deildarstjóri í Ösp og auk hennar starfa þrír sérkennari, þrír þroskaþjálfar , tveir leiðbeinendur, tveir félagsliðar og 12 stuðningsfulltrúar. Íþróttakennarar og list- og verkgreinakennarar Njarðvíkurskóla koma einnig að kennslu nemenda í Ösp. Frístundaheimili er starfrækt eftir skóla frá 13:30 -16:00 þar sem Ólöf Rafnsdóttir er umsjónarmaður. Nýkláruð viðbygging er fjórða stækkunin við sérdeildina, síðast var stækkað við hana árið 2012. Mikil þörf var orðin á að stækka húsnæðin og deildina vegna fjölgunar nemenda í bæjarfélaginu og koma upp aðstöðu fyrir starfsmenn sem var mjög bágborin í eldra húsnæðinu. Sparri byggingaverktakar sáu um verkið og sagði Ásgerður í sinni ræðu að Njarðvíkurskóli hefði ekki getað verið heppnari með verktaka. Framkvæmdir við húsið hófust í maí og reis það upp á miklum hraða og var mikill metnaður hjá öllum sem komu að byggingaframkvæmdum að þetta gengi hratt og fljótt fyrir sig svo starfsemin gæti byrjað sem næst skólasetningu. Ásgerður sagðist seint geta fullþakkað Sparramönnum og öðrum undirverktökum sem komu að verkinu hve hratt og vel þetta allt var gert og frágangur til fyrirmyndar. Ásgerður sagði húsnæðið glæsilegt sem Reykjanesbær gæti verið stoltur af að hafa í bæjarfélaginu og mun styrkja starfið mikið með það að markmiði að geta komið enn betur til móts við nemendur með sérþarfir. Í Ösp er unnið mjög gott starf og er horft til starfsemi sérdeildarinnar frá öðrum sveitarfélögum. Að lokum nefni Ásgerður hversu mikils virði fyrir sérdeildina sá stuðningur og velvild sem deildin hefur notið innan grenndarsamfélagsins, þar sem meðal annars hafa báðir Lionsklúbbarnir í Njarðvík, Kvenfélagið Njarðvík sem og Ásmundur Friðriksson hafa styrkt deildina mikið.

Einar Mikael töframaður og Ásmundur Valgeirsson söngvari skemmtu nemendum í 1.-6. bekk í íþróttahúsinu í morgun í tengslum við upphaf Ljósanætur. Einar Mikael sýndi fjölmarga töfra og sjónhverfingar en hann hefur notið ómældra vinsælda meðal yngstu kynslóðarinnar. Í framhaldi steig Ásmundur Valgeirsson á svið og söng ljósanæturlagið „Velkomin á Ljósanótt“ þar sem nemendur sungu hástöfum. Það er löngu orðin hefð í Njarðvíkurskóla að Ási komi og syngi fyrir nemendur í upphafi Ljósanætur.

Hugarfrelsi býður foreldrum barna og unglinga á Suðurnesjum upp á ókeypis foreldranámskeið. Hér er um stutt og hnitmiðað námskeið að ræða. Hraði og áreiti einkennir samfélag okkar í dag og eiga börn og unglingar oft á tíðum erfitt með að vera besta útgáfan af sér. Gríðarlegur tími fer í notkun á snjalltækjum sem ýtir undir samanburð og neikvæða sjálfsmynd. Mikilvægt er að börn og unglingar kunni að nýta sér einfaldar aðferðir til að staldra við, slaka á og njóta augnabliksins. Á námskeiðinu verður farið yfir: – Hvernig hægt er að leiðbeina börnum í að velja jákvæðni umfram neikvæðni – Hvernig foreldrar geta hjálpað börnum sínum að efla sjálfsmynd sína og styrkleika – Einfaldar öndunar-, slökunar- og hugleiðsluæfingar sem auka vellíðan, efla einbeitingu, hugarró og draga úr kvíða – Einfaldar leiðir til að hjálpa barninu þínu til að sofna Að námskeiðinu loknu ættu þátttakendur að hafa í höndum verkfæri til að nýta í uppeldinu svo börn þeirra nái að blómstra og finni aukna hugarró. Ef þú vilt efla þig sem foreldri og læra einfaldar aðferðir sem þú getur nýtt í uppeldinu þá er þetta námskeið tilvalið fyrir þig! 11. september 2019 (miðvikudagur) Kl. 20:00-21:30 Íþróttaakademían í Reykjanesbæ, Sunnubraut 35 Skráning á www.hugarfrelsi.is, takmarkaður sætafjöldi.

Aðalfundur foreldrafélags Njarðvíkurskóla Foreldrafélag Njarðvíkurskóla boðar til aðalfundar. Fundurinn verður haldinn á sal Njarðvíkurskóla miðvikudaginn 18. september kl. 20.00. Dagskrá: - Kosning fundaritara - Formaður flytur skýrslu stjórnar - Uppgjör ársins 2018 - 2019 - Kosning stjórnar FFN Tillögur af uppstillingu: - Kristín Hjartardóttir – Formaður - Geirný Geirsdóttir – Varaformaður - Vala Rún Vilhjálmsdóttir – Ritari - Henný Úlfarsdóttir – Gjaldkeri - Verkefni vetrarins 2019 - 2020 - Önnur mál Hlökkum til að sjá ykkur Stjórn foreldrafélags Njarðvíkurskóla